---

Неизвестный автор - Слово о погибели Русской земли после смерти великого князя Ярослава [XIII век]
Известность произведения: Низкая
Метки: Эпос

I 

О светло светлая
и украсно украшена
земля Русьская!
И многыми красотами удивлена еси:
озеры многыми, 
удивлена еси реками и кладязьми месточестьными,
горами крутыми,
холми высокими,
дубравами частыми,
польми дивными,
зверьми разноличьными,
птицами бещислеными,
городы великыми,
селы дивными,
винограды обителными, 
домы церковными
и князьями грозными,
бояры честными,
вельможи многами – 
всего еси испольнена
земля Руськая,
о правоверная
вера хрестияньская.
 
II

Отселе до Угоръ,
От Угоръ и до Ляховъ, 
от Ляховъ до Чаховъ, 
от Чаховъ до Ятвязи 
и от Ятвязи до Литвы, 
от Литвы до Немець, 
от Немець до Корелы, 
от Корелы до Устюга, 
где тамо бяху Тоймичи погании, 
и за Дышючимъ моремъ.
От моря до Болгарь, 
от Болгарь до Буртасъ, 
от Буртасъ до Черемисъ, 
от Черемисъ до Моръдви – 
то все покорено было богомъ 
крестияньскому языку поганьскыя страны:
великому князю Всеволоду,
отцю его Юрью, князю Кыевьскому,
деду его Володимеру и Манамаху,
которымъ то Половьци
дети своя полошаху в колыбели.
А Литва из болота
на светъ не выникываху.
А Угры твердяху
каменыи городы железными вороты,
абы на нихъ великый Володимеръ тамо не възехалъ.
А Немци радовахуся,
Далече будуче за синимъ моремъ.
Буртаси, Черемиси, Веда и Моръдва 
Бортьничаху на князя великого Володимера.
И кюръ Мануилъ цесарегородскый, опасъ имея,
поне и великыя дары посылаше к нему,
абы подъ нимъ великый князь Володимеръ
Цесарягорода не взялъ.

III

А в ты дни болезнь крестияномъ от великаго Ярослава
И до Володимера,
И до нынешняго Ярослава,
И до брата его Юрья, князя Володимерьскаго. …
The script ran 0.004 seconds.